छत्रपती कृषी महोत्सव सातारा जिल्ह्यातील नागरिकांसाठी पर्वणी : खा.उदयनराजे

सातारा,(भूमिशिल्प वृत्तसेवा): शेतकऱ्यांसाठी नव्या युगात खऱ्या अर्थाने मित्र ठरणाऱ्या प्रभावी तंत्रज्ञानाची कमाल असलेली खते ,औषधे स्प्रिंकलिंग करणारा स्वयंचलित ड्रोन या प्रदर्शन महोत्सवाचे आकर्षण आहे तसेच कर्नाटकातील बेळगाव जिल्ह्यातील दीड टन वजनाचा गजेंद्र हा सहा वर्षाचा रेडा या प्रदर्शनाचे प्रमुख आकर्षण ठरत आहे, याचा विशेष आनंद होत आहे. हे प्रदर्शन आपणा सर्वांसाठी खरोखरच मार्गदर्शक ठरेल व यातून आपल्याला नवनवीन विकास आणि तंत्रज्ञानाची ओळख होईल. त्याचबरोबर नामवंत देशातील कंपन्यांचे स्टॉल या प्रदर्शनामध्ये सहभागी असल्याने हा महोत्सव पुढील पाच दिवस सातारकरांना एक पर्वणीच ठरणार आहे, असे प्रतिपादन खा. श्री. छ. उदयनराजे यांनी व्यक्त केले.

स्मार्ट एक्स्पो ग्रुपच्या व्यवस्थापन अंतर्गत व मा.श्री.छ.खा उदयनराजे भोसले मित्र समूह,जय सोशल फाऊंडेशनच्यावतीने सातारा जिल्हा परिषद मैदानावर आयोजित भव्य राज्यस्तरीय छत्रपती कृषी प्रदर्शन २०२३ चे उद्घाटन श्री.छ.उदयनराजे भोसले यांच्या हस्ते फीत कापून करण्यात आले.याप्रसंगी ते बोलत होते.

यावेळी ज्येष्ठ कृषी तज्ञ आणि कृषी क्षेत्रातील मार्गदर्शक डॉ. बुधाजीराव मुळीक, माजी जि.प.शिक्षण सभापती सुनील काटकर,स्मार्ट एक्सपोर्टचे प्रमुख संयोजक सोमनाथ शेटे,जय सोशल फाउंडेशनचे सागर भोसले, जिल्हा कृषी अधीक्षक सौ.भाग्यश्री फरांदे,उपविभागीय कृषी अधिकारी गुरुदास काळे ,जिल्हा पशुसंवर्धन अधिकारी श्री.परिहार,कृषी विकास अधिकारी विजय माइणकर ,प्रीतम कळसकर, शिवानी कळसकर,माजी नगराध्यक्षा रंजना रावत,रेखा शेटे, जितेंद्र खानविलकर ,पंकज चव्हाण ,संग्राम बर्गे, काका धुमाळ आदी मान्यवर तसेच विविध शेती तसेच पशु विभागाचे मान्यवर अधिकारी,जय सोशल फाउंडेशनचे क्रियाशील सदस्य कार्यकर्ते यांची प्रमुख उपस्थिती होती.

खा.उदयनराजे भोसले म्हणाले, शेतकऱ्यांसाठी मी पुढे येत असताना डॉ.मुळीक साहेब यांनी नेहमीच मला मार्गदर्शन केलं आहे.आज या उद्घाटन सोहळ्यात मार्गदर्शक म्हणून ते लाभले आहेत याचा विशेष आनंद वाटतो. डॉ.मुळीक साहेबांनी स्वतःची जीवनशैली शेतकऱ्यांसाठी वाहिली. आज छत्रपतींची आठवण आली तरी त्या काळात छत्रपती शिवाजी महाराजांनी आपणा सर्वांना विचार दिला होता.आज हे प्रदर्शन खरोखरच वैशिष्ट्यपूर्ण ठरणारे आहे.लोकशाहीची संकल्पना ही महाराज साहेबांचीच होती लोकांचा सहभाग गरजेचा असून हेच ध्येय धोरण आम्ही पुढे अंगीकारत आहोत.आज शेतकऱ्यांसाठी आपण झटत असताना देशाचे लाडके पंतप्रधान नरेंद्र मोदी यांच्या हस्ते उद्घाटित झालेल्या आणि शेतकऱ्यांसाठी नव्या युगात खऱ्या अर्थाने मित्र ठरणाऱ्या प्रभावी तंत्रज्ञानाची कमाल असलेली खते ,औषधे,स्प्रिंकलिंग करणारा स्वयंचलित ड्रोन या प्रदर्शनात महोत्सवाचे आकर्षण आहे तसेच कर्नाटकातील बेळगाव जिल्ह्यातील दीड टन वजनाचा गजेंद्र हा सहा वर्षाचा रेडा या प्रदर्शनाचे प्रमुख आकर्षण ठरत आहे, याचा विशेष आनंद होत आहे. हे प्रदर्शन आपणा सर्वांसाठी खरोखरच मार्गदर्शक ठरेल व यातून आपल्याला नवनवीन विकास आणि तंत्रज्ञानाची ओळख होईल.

डॉ. बुधाजीराव मुळीक म्हणाले, साताऱ्यात खासदार उदयनराजे यांच्या मार्गदर्शनाखाली भरलेले हे प्रदर्शन आता देश पातळीवर जाणे गरजेचे आहे.आजवरील अनेक कृषी प्रदर्शनात मी सहभागी होतो. मात्र हे प्रदर्शन खऱ्या अर्थाने आगळे वेगळे आणि संयोजनाचा एक आदर्श असे उदाहरण आहे.सध्या शेतकऱ्यांना भीतीदायक ठरणारा लम्पी रोग साताऱ्यात मात्र कमी आहे. अशी प्रदर्शने खऱ्या अर्थाने मार्गदर्शनाचा केंद्रबिंदू असून हे प्रदर्शन भविष्यात खरोखरच देश स्तरावर मार्गदर्शनाचा एक टप्पा ठरेल असे वाटते. आता तुम्ही सर्वांनी जागृत होणे गरजेचे आहे. सातत्याने सर्वांनी न थांबता पुढे जरुरीचे आहे.महाराज साहेबांबरोबर आपल्या सर्वांची साथ यासाठी महत्त्वाची आणि मोलाची आहे. राजे साहेबांना खऱ्या अर्थाने आता कृषी मंत्री करणे आपणा सर्वांची जबाबदारी आहे.

कार्यक्रमाचे संयोजक सोमनाथ शेटे, रेखा शेटे व हेमलता भोसले यांनी सर्व मान्यवरांचे स्वागत केले. कार्यक्रमाचे सूत्रसंचालन सुनील मोरे यांनी केले.

छत्रपती कृषी महोत्सवांमध्ये उद्या गुरुवारी १९ ऑक्टोबर रोजी सकाळी दहा ते दुपारी चार या वेळेत देशी विदेशी जातीच्या नामवंत श्वानांच्या करिता श्वानप्रेमींकडून स्पेशल डॉग शोचे आयोजन करण्यात आलेले आहे.