अरूण गोडबोले यांचा शनिवारी साताऱ्यात सहस्त्रचंद्रदर्शन सोहळा

अभंगरंग मैफिलीसह आत्मचरित्र, काव्यसंग्रहाचे होणार प्रकाशन

सातारा,(भूमिशिल्प वृत्तसेवा): विविध क्षेत्रांत आपल्या कर्तृत्वाने नाममुद्रा कोरणारे सातारचे सुपूत्र, ज्येष्ठ करसल्लागार, चित्रपट निर्माते, साहित्यिक अरूण गोडबोले यांचा सहस्त्रचंद्रदर्शन सोहळा शनिवार, दि. ९ नोव्हेंबर रोजी सायंकाळी साडेचार वाजता येथील शाहू कलामंदिरात आयोजित करण्यात आला आहे. यावेळी श्री.अरूण गोडबोले व सौ.अनुपमा गोडबोले या दोघांचा अभिष्टचिंतन स्नेहमेळाव्यानिमित्त सत्कार करण्यात येणार आहे.

या कार्यक्रमाच्या अध्यक्षस्थानी दैनिक सकाळचे माजी मुख्य संपादक विजय कुवळेकर असतील. तसेच समर्थभक्त योगेशबुवा रामदासी, ज्येष्ठ विचारवंत डॉ. दत्तप्रसाद दाभोळकर, अभिनेते राहूल सोलापूरकर, कणेरी मठाचे काडसिद्धेश्वर स्वामी महाराज आदी मान्यवर प्रमुख पाहुणे म्हणून उपस्थित राहणार आहेत.

साताऱ्यातील शाहू कला मंदिरात शनिवारी दुपारी साडेचार ते साडेसहा या कालावधीमध्ये ख्यातनाम गायिका विदुषी मंजुषा पाटील यांचा “अभंगरंग” हा कार्यक्रम होणार आहे. साडेसहा ते सव्वाआठ या कालावधीमध्ये अभिष्टचिंतन सोहळा होणार असून यावेळी अरूण गोडबोले यांनी लिहिलेले ‘सकळ करणे जगदीशाचे’ हे आत्मचरित्र आणि ‘पारिजात’ या कवितासंग्रहाचे प्रकाशनही होणार आहे. कार्यक्रमाला सातारकरांनी उपस्थित राहावे, असे आवाहन गोडबोले कुटुंबीय आणि अरूण गोडबोले मित्रमंडळ यांनी केले आहे.