सातारा, (भूमिशिल्प वृत्तसेवा) : कोरोनामुळे राज्यात १२२ पत्रकारांचा वृत्तांकन करीत असताना मृत्यू झाला असून मृत पत्रकारांच्या कुटुंबीयांना ५ लाखांची आर्थिक मदत जाहीर करावी, सर्व पत्रकारांना फ्रंटलाईन वर्कर म्हणून लस उपलब्ध करून द्यावी या मागण्यांसाठी मराठी पत्रकार परिषदेने आत्मक्लेश आंदोलनाचा निर्णय घेतला. या आंदोलनास पाठिंबा देण्यासाठी सातारा जिल्हा पत्रकार संघाचे अध्यक्ष हरीष पाटणे यांनीही आत्मक्लेश आंदोलन सुरु केले आहे.
कोरोनाच्या दुसऱ्या लाटेमुळे लोकांच्या आरोग्याला धोका निर्माण झाला आहे. अशा परिस्थितीमध्ये पत्रकार आपल्या जीवाची बाजी लावून वृत्तांकन करण्याचे काम करीत आहेत. शासकीय अधिकारी व कर्मचाऱ्यांना फ्रंटलाईन वर्कर म्हणून पहिल्या टप्पात लस दिली. वैद्यकीय सेवा, पोलीस आणि इतर अत्यावश्यक सेवेतील कर्मचाऱ्यांसोबत पत्रकारही वृत्तांकन करीत आहेत. हे करीत असताना अनेक पत्रकारांना कोरोनाची बाधा झाली. त्यामध्ये काही पत्रकारांना उपचार न मिळाल्याने जीव गमवावा लागला.मराठी पत्रकार परिषदेचे मुख्य विश्वस्त एस एम देशमुख सरांच्या नेतृत्वाखाली महाराष्ट्रातील कोरोनामुळे मृत पावलेल्या पत्रकारांच्या वारसांना ५ लाख रुपये आर्थिक मदत मिळावी,पत्रकारांना कोरोना लस प्राधान्याने द्यावी,कोरोना पॉझिटिव्ह पत्रकारांच्या उपचारासाठी रुग्णालयात बेड सुविधा अग्रक्रमाने मिळाव्यात.इत्यादी प्रमुख मागणीसाठी आज महाराष्ट्र दिनी आत्मक्लेश आंदोलन करण्यात येत असून महाराष्ट्रातील 300 पेक्षा जास्त तालुका पत्रकार संघाचे वृत्तपत्र, इलेक्ट्रॉनिक्स व सोशल मीडियाचे पत्रकार यामध्ये सहभागी झाले आहेत.
दरम्यान, सातारा जिल्हा पत्रकार संघाचे अध्यक्ष हरीष पाटणे, सातारा पत्रकार संघाचे अध्यक्ष विनोद कुलकर्णी, ज्येष्ठ पत्रकार दीपक प्रभावळकर, जीवनधर चव्हाण, राहूल तपासे, तुषार तपासे, ओमकार कदम, सनी शिंदे, प्रशांत जगताप यांच्या शिष्टमंडळाने पालकमंत्री बाळासाहेब पाटील यांना पत्रकारांच्या मागण्यांचे निवेदन दिले. यावेळी पत्रकारांना फ्रंटलाईन वर्कर म्हणून त्यांचे व त्यांच्या कुटुंबियांचे वयोगटाचा विचार न करता सरसकट लसीकरण करावे. याबाबतचे कॅम्प स्वतंत्रपणे आयोजित करावेत. दिवंगत पत्रकारांच्या कुटुंबियांना किमान ५ लाख रुपये मदत करावी. जिल्ह्यातील मुख्य कोवीड हाॅस्पीटलमध्ये व तालुका पातळीवरील हाॅस्पीटलमध्ये पत्रकारांसाठी तातडीने बेड राखीव ठेवावेत, अशी मागणी करण्यात आली. त्यानंतर हरीष पाटणे यांनी आपल्या गावी वाण्याचीवाडी, ता. खंडाळा येथे पत्रकारांच्या मागण्यांसाठी आत्मक्लेश आंदोलनास सुरुवात केली.
राज्य सरकार पत्रकारांच्या मागण्यांकडे डोळेझाक करीत आहे.पत्रकारांच्या मागण्यांकडे दुर्लक्ष करणाऱ्या महाविकास आघाडी सरकारचा निषेध म्हणून हे आत्मक्लेश आंदोलन होत आहे.आत्मक्लेश आंदोलनाने तरी उद्धव ठाकरे सरकारचे डोळे उघडतील या अपेक्षेने हे आंदोलन करण्यात येत आहे.
You must be logged in to post a comment.