नागठाणे विभाग पत्रकार संघाचा पुरस्कार वितरण सोहळा सोमवारी

दै. ऐक्यचे गुरुदास अडागळे यांना “शोध पत्रकारिता” पुरस्कार

सातारा,(भूमिशिल्प वृत्तसेवा) : पत्रकार दिनाचे औचित्य साधून नागठाणे भाग बहुउद्देशीय पत्रकार संघाच्या वतीने विविध क्षेत्रात उल्लेखनीय कामगिरी करणाऱ्या मान्यवरांचा सन्मान व दिनदर्शिका प्रकाशन सोहळा सोमवार, दि. ६ जानेवारी रोजी सायंकाळी ६ वाजता नागठाणे (ता. सातारा) येथील नागठाणे कॉलेजच्या प्रांगणात आयोजित करण्यात आला आहे.

यावेळी दै. ऐक्यचे पत्रकार गुरुदास अडागळे यांना “शोध पत्रकारिता” पुरस्काराने सन्मानित करण्यात येणार आहे.या विशेष प्रसंगी नामवंत मान्यवरांच्या उपस्थितीत पुरस्कार वितरण होणार असून कार्यक्रमाला मोठ्या संख्येने नागरिकांनी उपस्थित राहण्याचे आवाहन आयोजकांनी केले आहे.

पुरस्कार वितरण सोहळ्याला खासदार उदयनराजे भोसले, आमदार शिवेंद्रसिंहराजे भोसले, आमदार मनोज घोरपडे, माजी खासदार श्रीनिवास पाटील, माजी आमदार बाळासाहेब पाटील, तसेच भाजप जिल्हाध्यक्ष धैर्यशील कदम व शिवसेना संपर्क प्रमुख शरद कणसे हे प्रमुख पाहुणे म्हणून उपस्थित राहणार आहेत.

सन्मानित पुरस्कार विजेते

या वर्षी विविध क्षेत्रातील मान्यवरांचा योगदानाबद्दल गौरव करण्यात येणार आहे. यामध्ये संतोष भोसले-पाटील यांना उद्योगरत्न, गुरुदास अडागळे यांना शोध पत्रकारिता, प्रवीण पाटील यांना आरोग्यदूत, मधुआण्णा खुळे यांना समाजसेवा गौरव, जयवंत जाधव यांना शिक्षणरत्न, शहाजी साळुंखे यांना पर्यटनभूषण, शुभम यादव यांना युवा कृषिरत्न आणि जोतिर्लिंग देवस्थान ट्रस्टला अध्यात्म सेवा पुरस्काराने मान्यवरांच्या हस्ते गौरविण्यात येणार आहे.

विशेष सन्मान

राष्ट्रीय नेमबाज खेळाडू अमेय निकम, तसेच ॲड. धनाजी जाधव-पाटील, ॲड. प्रवीण गोरे, वरिष्ठ पत्रकार सुनील शेडगे यांनाही या कार्यक्रमात विशेष सन्मान प्रदान करण्यात येणार आहे.

कार्यक्रमाच्या यशस्वी आयोजनासाठी नागठाणे विभाग पत्रकार संघाचे अध्यक्ष धनाजी कणसे, सचिव शंकर कदम, सूर्यकांत पवार आणि संघाचे सर्व सदस्य परिश्रम घेत आहेत.

सर्व पत्रकार, मान्यवर, आणि नागरीकांनी या महत्त्वाच्या सोहळ्याला उपस्थित राहावे, असे आवाहन संघाच्यावतीने करण्यात आले आहे.